Скаут Алекс Великих: «Сәтпаев – Еуропаға жол ашқан жарқын мысал»
Миланға ұпай үшін емес, тәжірибе мен назар үшін барған «Қайрат» Чемпиондар лигасында тағы да өзін көрсетті, деп хабарлайды Prosports.kz.
«Интерге» қарсы сырт алаңдағы матчта алматылықтар есепті теңестіргенімен (1:2), тәжірибелі италиялықтар соңында жеңісті өз алаңында ұстап қалды. Дегенмен, «Қайраттың» атақты «Сан-Сиродағы» ойыны еуропалық скауттардың назарын өзіне аудартты. Бұл туралы Prosports.kz тілшісі Италияда клубтармен жұмыс істейтін скаут, AV Scouting агенттігінің басшысы Алекс Великихпен сөйлесті.
- Алекс, «Қайраттың» Италияда өткізген алғашқы Лига чемпиондарындағы ойыны скауттар үшін қаншалықты қызықты болды деп ойлайсыз?
- Қазақстан клубының мұндай деңгейдегі турнирде ойнауы – өзі үлкен құбылыс. Иә, қызығушылық көбірек символикалық сипатта, бірақ ол бар. Скаутинг географиясы кеңейіп келеді, ал жаңа нарықтар – әрқашан қызық. Әсіресе, Италия клубтары соңғы жылдары жас әрі қолжетімді ойыншыны тауып, оны кейін АПЛ клубтарына сату жүйесін дамытып жатыр.
- Скауттар жаңа есімдер ашты ма, әлде бұрыннан таныс ойыншыларды бақылап жүр ме?
- Көпшілігі бұрыннан зерттелген. Кейбіріне қызығушылық бар, бірақ нақты шешім – осындай халықаралық матчтардағы ойынына байланысты қабылданады. Дәл осындай кездесулерде ойыншылар өзін көрсетуі тиіс.
- Қазір италиялық скауттар Қазақстандағы басқа клубтардың жастарына назар аударып жатыр ма, әлде тек «Қайраттың» тәрбиеленушілерін қарауда ма?
- Негізі олар ойыншы бар жерге қарауы керек. Бірақ шындық сол – көбіне оларға «жарық түсірілген» бағытты бақылайды. Ал қазір сол жарық «Қайратқа» түскен.
- «Қайраттың» жастарға инвестиция жасап, өз академиясын дамытуға ден қойғаны қаншалықты маңызды?
- Бұл – тамаша қадам. Футболшылар экспортын дамыту – ел футбол индустриясына үлкен серпін береді. Мемлекеттік қолдаудан бөлек, бұл модель өзін-өзі қамтамасыз ете алады. Еуропада танылу – академия үшін үлкен пайда.
- Дастан Сәтпаев Еуропаға жол ашқан ойыншы атанып жатыр. Ол шын мәнінде өз әріптестерінің жолын ашты ма, әлде назардың бәрі соған ауысып кетті ме?
- Керісінше, Сәтпаев – басқаларға да мүмкіндік ашып берді. Ол Қазақстан футболы үшін феноменге айналды. Егер ол Еуропада ойнай бастаса, бұл – жаңа деңгей болмақ. Ал скауттар логикасы қарапайым: бір дарынды ойыншы бар болса, демек, басқалар да бар. Сондықтан Сәтпаев – тек жеке тұлға емес, бүкіл қазақстандық жас футболшылар үшін «жарық шамы» секілді үлгі.