«Қайрат» Чемпиондар лигасында алғашқы ұпайын еншілеп, Мартынович турдың үздік құрамына енді
Алматылық «Қайрат» тарихында алғаш рет Чемпиондар лигасының топтық кезеңінде ұпай жинады, ал команда қорғаушысы Александр Мартынович Sofascore нұсқасы бойынша үшінші турдың символикалық құрамына енгізілді, деп хабарлайды Prosports.kz.
Беларусь ойыншысы 9,4 ұпай жинап, турдың ең жоғары баға алған футболшыларының бірі атанды. Мартынович Кипрдің «Пафосына» қарсы өткен кездесуде (0:0) мінсіз ойын көрсетіп, қорғаныста бір де бір қателік жібермеді.
Сондай-ақ тур құрамына Виктор Осимхен, Витинья және Маркус Рэшфорд енді. Ал турдың үздік ойыншылары деп «Тоттенхэм» қақпашысы Викарио мен «Барселона» жартылай қорғаушысы Фермин Лопес танылды (екеуіне де 10 ұпай берілді).
Үш турдан кейін «Қайрат» бір ұпаймен Чемпиондар лигасының топтық кезеңінде 36 команданың ішінде 34-орында тұр.