Дензел Бентли Жәнібек Әлімханұлынан реванш алғысы келеді
Британиялық промоутер Фрэнк Уорреннің (Queensberry Promotions) айтуынша, оның шәкірті Дензел Бентли WBO және IBF нұсқалары бойынша әлем чемпионы Жәнібек Әлімханұлымен реванш өткізуге әлі де ниетті, деп хабарлайды Prosports.kz.
Орта салмақта Ұлыбританияның үш дүркін чемпионы Бентли 2022 жылы қазақстандық боксшыдан төрешілердің бірауыздан шешімімен жеңілген еді. Сол уақыттан бері ол сол жеңіліс үшін қарымта кездесу өткізгісі келетінін бірнеше рет мәлімдеген.
«Біз әзірге нақты білмейміз, бірақ 25 қазандағы жекпе-жек өтпей қалуы мүмкін. Үлкен ықтималдықпен ол шегеріледі. Қазір осы мәселені реттеумен айналысып жатырмыз.
Жәнібекпен реваншқа келсек, біз Дензел үшін оны ұйымдастыруға біраз уақыттан бері тырысып келеміз. Қалай болатынын көрейік. Жәнібектің алда жекпе-жегі бар, содан кейін ол өз міндетті қарсыласымен айқасуы тиіс. Сол кезде Дензел де онымен жұдырықтасуға дайын тұруы керек», — деді Уоррен.
Бастапқыда Бентли венесуэлалық Эндри Сааведрамен WBO белбеуіне міндетті үміткер атағы үшін жекпе-жек өткізуі тиіс болған, алайда кездесу күні әзірге белгісіз. Ал америкалық БАҚ мәліметінше, Жәнібек Әлімханұлы желтоқсан айында WBA чемпионы Эрисланди Ларамен үш белбеуді біріктіру үшін келіссөз жүргізіп жатыр.