«Қазақстан бокс федерациясының кубогі» атты республикалық турнир басталды
Бүгін елордадағы Beeline Arena спорт сарайында «Қазақстан бокс федерациясының кубогі» республикалық турнирінің іріктеу кезеңі салтанатты түрде ашылды, деп хабарлайды Prosports.kz.
Ашылу рәсіміне Қазақстан бокс федерациясының бас хатшысы Мерей Ақшалов, Астаналық бокс федерациясының атқарушы директоры Бауржан Тлеулиев және қалалық «Спорттық іс-шараларды өткізу дирекциясының» басшысы Азамат Белгібаев қатысып, жарысқа қатысушыларға ізгі тілектерін білдірді.
Салтанатты жиында сөз алған Астаналық бокс федерациясының атқарушы директоры Бауржан Тлеулиев турнирдің маңызына тоқталып:
– Бұл жарыс – еліміздің бокс тарихындағы айрықша белестердің бірі. Қазақ боксы – халқымыздың ұлттық мақтанышы, әлем мойындаған бренд. Жарыс қорытындысы бойынша жеңімпаз команда республикалық финалға жолдама алады. Бұл дода – жас спортшылар үшін үлкен аренаға бастайтын алғашқы баспалдақ, – деді.
Турнирге Ақмола, Қостанай, Павлодар, Солтүстік Қазақстан облыстары мен елорданың намысын қорғайтын 70-ке жуық былғары қолғап шебері қатысуда.
Ерлер 8 салмақ дәрежесінде (50, 55, 60, 65, 70, 80, 90, +90 кг) және әйелдер 7 салмақ дәрежесінде (51, 54, 57, 60, 65, 70, 75 кг) сынға түседі.
Айта кетейік бүгін шаршы алаңда іріктеу кезеңіне жолдама алған ең мықты 5 команда өзара бақ сынамақ. Жарыс қорытындысы бойынша бірінші орынды жеңіп алған команда республикалық жарыстың финалдық кезеңіне жолдама алады.
IBA ұйымы ерлер арасындағы әлем чемпионатын өткізетінін мәлімдеді
World Boxing президенті отставкаға кетсе Головкин басты үміткер атанады