«Барыс» маусым алдындағы соңғы дайындықтарын Астанада өткізеді
«Трактормен» кездесуге дейін астаналық «Барыс» екі рет «Сибирьмен» жолдастық матч өткізеді, деп хабарлайды Prosports.kz.
Бұл жазғы маусымда «Барыс» барлығы бес ойынға шықты. Оның үшеуі Магнитогорскіде өткен Иван Ромазан мемориалында болды. Турнирге екі мәрте Гагарин кубогын иеленген «Металлург» пен «Салават Юлаев», сондай-ақ «Барыс» пен ВХЛ өкілі – «Магнитка» қатысты.
Астаналықтар үш кездесудің екеуінде жеңілсе де, жеңіл қарсылас емес екенін көрсетті. Команда толық құрамда болмағанымен, қазақстандық жас ойыншылар өздерін жақсы қырынан танытып, негізгі құрамға таласуға мүмкіндік алды. Бұны ұлттық құраманың көшбасшысы, «Металлург» шабуылшысы Никита Михайлис те атап өтті. Оның сөзінше, «Барыс» жаңа құрам жасақтап жатыр және белсендірек хоккей ойнауға бет бұрған.
Жаңа маусым алдындағы соңғы дайындық аясында «Барыс» Астанада «Сибирьге» қарсы екі ойын өткізеді. Кездесулер 1 қыркүйекте 17:00-де, ал 2 қыркүйекте 18:00-де басталады.