Волейболдан әлем чемпионаты: Қазақстан жастары Аргентинаны жеңді
Қытайдың Цзянмэнь қаласында волейболдан 21 жасқа дейінгілер арасында өтіп жатқан ХХІІІ әлем чемпионатында Қазақстан құрамасы кезекті матчын өткізді, деп хабарлайды Prosports.kz тілшісі ҚазАқпаратқа сілтеме жасап.
Бұл жолы Сергей Трикоз жаттықтыратын жастар Аргентина командасымен сынға түсті.
Кеше қазақстандықтар 9-16 орындар үшін матчта 2:3 есебімен Болгарияға есе жіберсе, Аргентина дәл сондай тартысты бәсекеде Жапониядан ұтылып қалған еді (2:3).
Қос команданың арасындағы бүгінгі ойын да сондай тартысқа толы болды. Әп дегенде Аргентина алға шықты — 28:26. Қазақстан таразы басын теңестірді — 25:21. Аргентиналықтар қайтадан алға кетті — 25:18. Қазақстандықтар төртінші партияда 26:24 есебімен есе қайырып, соңғы, шешуші сетте жеңісті жұлып алды — 15:13.
Қорытынды есеп — 3:2, Қазақстанның пайдасында. Қазақстандықтар енді 13-орын үшін таласады.
Биыл өз тарихында алғаш рет әлем чемпионатына қатысып жатқан қазақстандық жастар үшінші жеңісіне қол жеткізді. Бұдан бұрын топтық бәсекеде Қазақстан командасы Пуэрто-Рико мен Оңтүстік Кореяны ұтқан еді.
Қазақстан волейболдан жастар арасындағы әлем чемпионатында үздік ондық қатарына ене алмады
Волейболдан жастар арасындағы ӘЧ: Қазақстан ширек финалға шыға алмады