Тартысты додаға дайын: қазақстандық таеквондошылар Оңтүстік Кореядағы Гран-При кезеңінде бақ сынайды
28-31 тамыз аралығында Оңтүстік Кореяның Муджу қаласында таеквондодан World Taekwondo Grand Prix Challenge турнирі өтеді. Төрт күнге созылатын байрақты бәсекеге Қазақстан құрамасы негізгі құраммен қатысады. Толығырақ Olympic.kz материалында, деп жазады Prosports.kz.
Тура екі күннен кейін Муджу (Оңтүстік Корея) қаласында халықаралық рейтингтік турнир Гран-при кезеңі жалауын көтермек. Аталмыш додаға әлемнің көшбасшы таеквондошылары қатыспақ. Турнирге 30 түрлі федерациядан 334-ке жуық спортшы барады. Сонымен қатар бейтарап мәртебедегі (AIN) спортшылар және босқындар құрамасы (TRT) бақ сынайды.
Қазақстан құрамасы соңғы мәрте толық құраммен 14-16 тамыз аралығында өткен Kazakhstan Open-2025 турнирінде бақ сынады. Енді міне араға бірер апта салып, беделді турнирге қатысқалы отыр.
Жалпы отандастарымыз елімізде өткен G1-санатындағы Kazakhstan Open турнирінде сәтті өнер көрсеткен болатын. Естеріңізге сала кетсек, қазақстандықтар сол турнирде 38 медаль жеңіп алды. Оның ішінде 10 медаль алтын. Дәл осындай көрсеткішпен командалық есепте бірінші орынға көтерілді.
Енді дәл осындай қарқынмен Оңтүстік Кореяның Муджу қаласында өтетін турнирге аттанды. Командалық есепте көш бастау қиын болар. Дегенмен, Қазақстан құрамасының негізгі көшбасшылары жарысқа қатысушылардың тізіміне енген.
Ерлер:
- Тамерлан Тілеулес (58 келіге дейін)
- Асқар Өтеген (58 келіге дейін)
- Жавохирхон Исламов (58 келіге дейін)
- Дамир Шуленов (68 келіге дейін)
- Нұрбек Ғазез (68 келіге дейін)
- Батырхан Төлеуғали (80 келіге дейін)
- Абдурахмон Марипов (80 келіге дейін)
- Ерасыл Орынбасар (80 келіге дейін)
- Бейбарыс Қаблан (80 келіден жоғары)
- Бауыржан Хасенов (80 келіден жоғары)
Әйелдер:
- Нодира Ахмедова (49 келіге дейін)
- Нұрай Бауыржанова (49 келіге дейін)
- Мария Севостьянова (57 келіге дейін)
- Камила Аймұқашева (57 келіге дейін)
- Нұрай Хусайнова (67 келіге дейін)
- Назым Махмұтова (67 келіден жоғары)
Егер тізімге зер салар болсақ, онда құрама көшбасшыларының бірі Самирхон Абабакиров жоқ. Ұлттық құраманың бас бапкері Есбол Сұлтанов Olympic.kz сайтына берген сұхбатында спортшының не себеппен жарысқа қатыспайтынын мәлемдеді.
"Оңтүстік Кореяда өтетін Гран-при кезеңі тек олимпиадалық салмақ дәрежелері бойынша ұйымдастырылады - бұл 58 және 68 келі. Ал Самирхон қазір олимпиадалық емес 63 келі салмақта өнер көрсетеді. 68 келіге көтеруге әлі шешім қабылдаған жоқпыз. Сондықтан Самирхон бұл жарысқа қатыспайды", - деді маман.
Самирхон Абабакиров (63 келі) соңғы екі айда жоғары нәтижелерге қол жеткізе білді. Мысалы, 17-23 шілде аралығында Германияда өткен Универсиада ойындарында алтын медаль жеңіп алды. Одан бөлек, Kazakhstan Open турнирінде күмістен алқа тақты. Жалпы спортшы қазір бабында деуге толық негіз бар.
Гран-при кезеңі Муджу қаласындағы T1 Arena алаңында өтеді. Жанкүйерлерді тартысқа толы жекпе-жектер күтіп тұрғаны сөзсіз. Себебі, аталмыш додаға 2024 жылғы Париж Олимпиадасының чемпиондары мен жүлдегерлері қатысады. Атап айтсақ, Фирас Катусси (Тунис), Альтея Лорен (Франция), кореялық Пак Тхэджун (Оңтүстік Корея) және Парижде күміс жүлдегер атанған өзбекстандық Светлана Осипова бар.
Одан бөлек, жуырда АҚШ-тың Шарлотт қаласында өткен Гран-при кезеңінде жүлдеге қол жеткізген америкалық СиДжей Николас және бразилиялық Мария Клара Пачеко бар. Бұл спортшылар бәсекенің көркін қыздырары анық.
Универсиада - 2025: Батырхан Төлеуғали қола жүлдегер атанды