Волейболдан әлем чемпионаты: Қазақстан жастар құрамасы плей-офф кезеңіне шықты
Қытайдың Цзянмэнь қаласында волейболдан 21 жасқа дейінгілер арасында өтіп жатқан ХХІІІ әлем чемпионатында Қазақстан құрамасы екінші жеңісіне қол жеткізді, деп хабарлайды Prosports.kz тілшісі ҚазАқпаратқа сілтеме жасап.
Сергей Трикоз жаттықтыратын қазақстандықтар кеше В тобында көш бастап келе жатқан командалардың бірі – Польшаға 0:3 (21:25, 21:25, 22:25) есе жіберген еді.
Бүгін Қазақстан құрамасы Оңтүстік Кореямен шешуші ойынын өткізді. Осыған дейін қазақстандықтар қоржынында 4 ұпай болса, оңтүстіккореялықтар (6 ұпай) алда тұрған еді.
Сондықтан қазақстандықтарға үш ұпай алу керек болатын.
Бірінші партияда оңтүстіккореялықтар 25:17 есебімен басымдылық танытты. Дегенмен бұдан кейін С.Трикоз шәкірттері қатарынан екі сетті алды – 25:23, 25:22.
Төртінші партия барысында Оңтүстік Корея командасы 13:9 есебімен алда тұрды.
Қазақстандықтар таразы басын теңестіре білді – 14:14. Сосын 18:15 есебімен алға шықты. Ақыры жеңіс нүктесін қойды – 25:22.
Қорытынды есеп – 3:1, Қазақстанның пайдасында.
Осылайша, әлем чемпионатына өз тарихында алғаш рет қатысып жатқан қазақстандықтар өз тобынан үшінші орынмен плей-офф кезеңіне шықты.
Волейболдан ӘЧ: Қазақстан жастар құрамасы тарихи жеңіске ие болды
Италияда футболшы демалыста қаза тапты
Қазақстан гандболдан 2026 жылғы жасөспірімдер арасындағы әлем чемпионатына жолдама жеңіп алды