«Аль-Хиляль» Антуан Гризманнға жомарт ұсыныс жасады
Франция құрамасының шабуылшысы Антуан Гризманн осы жазда Мадридтің «Атлетико» клубынан кетуі мүмкін, деп хабарлайды Prosports.kz.
Gazetaexpress мәліметінше, Сауд Арабиясының «Аль-Хиляль» клубы 33 жастағы футболшыны қатарға қосуға ниетті. Бас бапкер Симоне Индзагидің бастамасымен клуб ойыншыға 20 миллион еуро көлемінде трансфер төлемін ұсынып, өте тиімді келісімшарт әзірлеген.
Гризманн жақында ғана «Атлетикомен» 2027 жылға дейін келісімін ұзартқанымен, жаңа маусымдағы позициясы әлсіреген. Тьяго Альмада мен Алекс Баэна секілді жаңа ойыншылардың келуі, сондай-ақ шабуыл шебіне басқа футболшылардың қаралуы оның негізгі құрамдағы орнын қиындатуы мүмкін.
Дегенмен Гризманн осы уақытқа дейін «Атлетикоға» адал екенін талай мәрте айтқан. Бірақ бұл ұсыныс оның Еуропадағы мансабын аяқтауға түрткі болуы ықтимал. Клуб басшылығы оның кету ықтималдығын барлық жағынан таразылап отыр — бұл шешім жалақы қорын жеңілдетіп, жаңа ойыншыларды алуға жол ашуы мүмкін.