Қобыландыдағы сенсация. «Ақтөбе» ерледі
Бүгін, 24 шілдеде қазақстандық «Ақтөбе» чехиялық «Спартаға» қарсы кездесу өткізді, деп хабарлайды Prosports.kz.
Конференция лигасының екінші іріктеу кезеңі аясында өткен матчта «ақ-қызылдар» прагалық «Спартаны» қабылдады. Ақтөбе қаласындағы Қобыланды батыр атындағы стадионда өткен кездесуде алаң иелері 2:1 есебімен жеңіске жетті. Бірінші таймның 29-минутында Богдан Вэтэжелудің нәтижелі пасынан кейін Даниэль Созах есеп ашты. Ал екінші таймның 83-минутында алаң иелері есепті еселеді. Матчтағы екінші голдың авторы Оралхан Өміртаев атанды. Матч соңына қарай «Ақтөбе» қақпасына төреші күмәнді пенальти белгілеп, нәтижесінде қонақтар есеп айырмасын қысқарта алды.
Командалар арасындағы қарымта ойын 31 шілдеде өтеді.
Еске салайық, «Ақтөбе» еуромаусымды Еуропа лигасында бастағанымен, польшалық «Легиядан» жеңіліп (0:2), Конференция лигасына түсті.
Айта кетейік, осы маусымда еурокубоктарда Қазақстан намысын төрт клуб қорғады. Дегенмен, «Ордабасы» Конференция лигасының бірінші турында Тбилисидің «Торпедо» командасынан жеңіліп, жарыстан шығып қалды.
Конференция лигасы. Екінші іріктеу кезең
«Ақтөбе» (Ақтөбе, Қазақстан) - «Спарта» (Прага, Чехия) 2:1 (1:0)
Гол: Созах 29, Өміртаев 83, Бирманчевич 90 (пенальтиден)
Конференция лигасы: «Астана» өз алаңында жеңіске жете алмады