Қазақстан кубогының жартылай финалистері белгілі болды
Қазақстан кубогының жартылай финалына шыққан командалар белгілі болды, деп хабарлайды Prosports.kz.
«Ордабасы» өз алаңында ел чемпионатында жеңіліссіз келе жатқан «Қайратты» 1:0 есебімен тізе бүктірді.
Пенальти сериясында үздік шыққан «Қызылжар» семейлік «Елімайды» жарыс жолынан шығарды. Негізгі уақыт 0:0 есебімен аяқталған болатын.
Қостанайлық «Тобыл» Түркістанда жергілікті «Тұранды» 0:2 есебімен жеңіп шықты.
Негізгі уақытта 1:1 есебімен аяқталған астаналық дерби пенальти сериясына дейін жалғасты. Нәтижесінде «Жеңіс» «Астананы» жеңіп, келесі кезеңге жолдама алды.
Осылайша жартылай финалда «Қызылжар» – «Ордабасы» және «Тобыл» – «Жеңіс» командалары кездеседі.
Айта кетейік, жартылай финал ойындары екі матчтан тұрады. Матчтар маусым айында өтеді деп жоспарланған.