UFC Махачевті чемпиондық титулынан айыруы мүмкін
Ресейлік файтер, жеңіл салмақта UFC чемпионы Ислам Махачев чемпиондық белбеуінен айырылуы мүмкін, деп хабарлайды Prosports.kz.
Бұл жағдай Махачев испан файтері Илия Топуриямен жекпе-жекке шығудан бас тартқан жағдайда жүзеге аспақ.
Наурыз айында Махачев Топуриямен октагонға шығуға әлі келісім бермегені туралы ақпарат тараған. Себебі ол Топурия «чемпиондық жекпе-жекке лайық болуы керек» деп есептейді. Егер Махачев жекпе-жектен бас тартса, UFC оны чемпиондық атағынан айырады, ал Топурия бразилиялық Чарльз Оливейрамен кездесуге мүмкіндік алады.
19 қаңтар күні Лос-Анджелесте өткен UFC 311 турнирінің басты жекпе-жегінде Махачев бразилиялық Ренато Мойканоны жеңіп, чемпиондық белбеуін төртінші рет қорғап шыққан еді. Жекпе-жектің орта тұсында Махачев қарсыласын партерге түсіріп, берілуге мәжбүрледі. Бастапқыда Махачев Арман Царукянмен айқасуы тиіс болған. Алайда 17 қаңтарда Царукян жекпе-жектен бас тартты.