«Бешікташ» жазда бірнеше ойыншымен қош айтысуы мүмкін: тізімде Зайнутдинов бар ма?
Түркиялық «Бешікташ» клубы алдағы жазғы трансферлік терезеде бірнеше шетелдік ойыншымен қош айтысуды жоспарлап отыр, деп хабарлайды Sports.kz порталы Sözcü басылымына сілтеме жасап.
Ақпаратқа сәйкес, командадан кетуі мүмкін ойыншылар тізімін италиялық шабуылшы Чиро Иммобиле бастап тұр. Сонымен қатар бұл тізімге қазақстандық Бақтиер Зайнутдинов, Жоау Мариу, Феликс Удуокай, Габриэль Паулиста және Алекс Окслейд-Чемберлен енген. Бұлардан бөлек, Онур Булут пен Тайып Талха есімді түрік ойыншыларының да команданы тастап кетуі мүмкін екені айтылған.
Болжам бойынша, егер «қара-ақтар» осы ойыншылардың барлығымен қош айтысса, клубтың жалақы қорында 20 миллион еуро босайды. Оның ішінде тек Иммобиле мен Чемберленнің жалақысы 10 миллион еуроны құрайды. Осыған байланысты клуб басшылығы олардың кетуі қиынға соғуы мүмкін екенін де жоққа шығармайды.