Қазақ боксшысы Альбина Молдажанова кәсіпқой бокста бақ сынамақ
Ресей құрамасының атынан өнер көрсететін 23 жастағы қазақ боксшысы Альбина Молдажанова 18 сәуір күні Челябі қаласында өтетін IBA.PRO 2 турнирінде рингке шығады, деп хабарлайды Prosports.kz.
Альбинаның қарсыласы — отандасы Нурият Алибекова. Жекпе-жек алты раундқа жоспарланған және 66 келіге дейінгі салмақ дәрежесінде өтеді. Бұл екеуінің де кәсіби бокстағы дебюті болмақ.
Кештің басты жекпе-жегі — жартылай ауыр салмақтағы бұрынғы әлем чемпионы Сергей Ковалев пен германиялық Артур Манн арасындағы кездесу. Бұл Ковалев үшін қоштасу жекпе-жегі болмақ. 10 раундқа созылатын бұл айқаста бірінші ауыр салмақтағы IBA Intercontinental белбеуі сарапқа салынады.
Альбина Молдажанова — 2025 жылғы әлем чемпионатының қола жүлдегері, 2024 жылғы Еуропа чемпионатының финалисі, сондай-ақ Ресей чемпионатының жеңімпазы және 2023 жылғы жастар арасындағы Еуропа чемпионатының чемпионы.