Усик – Дюбуа: жекпе-жектің уақыты белгілі болды
Ауыр салмақтағы IBF нұсқасы бойынша әлем чемпионы Даниэль Дюбуа WBC, WBA, WBO және IBO титулдарының иегері Александр Усикпен шілде айында Лондондағы «Уэмбли» стадионында реванш өткізуді жоспарлап отыр, деп хабарлайды Prosports.kz.
«Усикпен шілдедегі үлкен жекпе-жек – менің қалағаным осы. Келіссөз жүріп жатыр. Екі тарап та бұл кездесуді өткізгісі келеді. Мен әрдайым жекпе-жекке дайынмын және қоңырауды күтемін. Кіммен болса да, мен рингке шығып, нағыз шайқас көрсетуге әзірмін.
«Уэмблидегі» Усикке қарсы жекпе-жек Джошуамен болған кездесуге ұқсас, бірақ әлдеқайда ауқымды болады. Бұл – абсолют чемпион атағы үшін өтетін тарихта қалатын айқас. Бұл нағыз тарихи оқиға болмақ.
Мен оны жеңген алғашқы боксшы боламын. Жекпе-жек туралы жаңалықтар жақында шығады», – деді Дюбуа The Ring басылымына берген сұхбатында.
Еске салайық, 2023 жылы тамызда Усик Дюбуаға қарсы жекпе-жекте тоғызыншы раундта нокаутпен жеңіске жеткен болатын.
Даниэль Дюбуа кейінгі жекпе-жегін 2024 жылы қазанда өткізіп, Энтони Джошуаны бесінші раундта нокаутпен жеңген еді. Оның кәсіпқой рекорды: 22 жеңіс (21 нокаут) және 2 жеңіліс.
Александр Усик 2024 жылы желтоқсанда рингке шығып, Тайсон Фьюриді төрешілердің бірауыздан қабылдаған шешімімен жеңді. Оның рекорды: 23 жеңіс (14 нокаут) және бірде-бір жеңіліс жоқ.