Канелоның орнын басатын мұрагер анықталды ма?
WBA, WBC және WBO тұжырымдары бойынша екінші орта салмақтағы қазіргі чемпион Сауль «Канело» Альварес өзінің орнын кім басатынын айтты. Ол алдағы айда кәсіпқой рингте алғашқы жекпе-жегін өткізетін Марко Вердені Мексиканың болашақ жұлдызы ретінде көреді.
«Жас боксшылар көп, бірақ қазір ең үміттісі — Марко Верде. Мен онымен бірге жұмыс істедім, арманы мен тәртібін көріп, оның үлкен жетістікке жететініне сенімді болдым. Ерекше таланты бар жігіт», — деді Альварес Fight Hype басылымына берген сұхбатында.
Канело келесі кездесуін 3 мамырда Сауд Арабиясының Эр-Рияд қаласында өткізеді. Қарсыласы — Уильям Скалл.
Еске салсақ, Сауль Альварес соңғы жекпе-жегін 2024 жылдың қыркүйегінде Эдгар Берлангамен өткізіп, барлық раундқа созылған айқаста бірауыздан жеңіске жеткен болатын. Қазіргі кезде оның еншісінде 62 жеңіс (соның ішінде 39 нокаут), 2 жеңіліс және 2 тең нәтиже бар.