Өзбекстан атынан сынға түсіп жүрген этникалық қазақ бокстан әлем кубогын жеңіспен бастады
Бокстан Бразилияда өтіп жатқан World Boxing ұйымының Әлем кубогінде өзбекстандық этникалық қазақ Мадияр Данияров алғашқы жекпе-жегін сәтті өткізді, деп хабарлайды Prosports.kz.
Ол Фос-ду-Игуасуда өтіп жатқан турнирде 60 келіде өнер көрсетуде. Данияров ширек финалда италиялық Микеле Бальдассиді 4:1 есебімен жеңді. Сөйтіп жартылай финалға жолдама алды. Яғни, Мадиярдың қоржынында кем дегенде қола жүлде бар.
Айта кетейік, бұл жарысқа Қазақстан атынан ерлер арасында 8 боксшы қатысып жатыр. Олардың үшеуі жеңіліп қалды. Алдымен 60 келідегі Талғат Сырымбетов бразилиялық Луис Оливейраға жол берсе, 50 кг салмақтағы Нұрзат Оңғаров өзбек боксшысы Асилбек Жалиловқа есе жіберді. 65 кг салмақ дәрежесінде Алмат Адбуали бразилиялық Юри Рейспен кездесіп, 5:0 есебімен жеңілді.