Волейбол: «Ақтөбе» чемпиондық үшін алғашқы кездесуде «Жайықты» жеңді
Орал қаласындағы «Жайық арена» спорт кешенінде волейболдан ерлердің ұлттық лига командалары арасында Қазақстан чемпионатының финалында «Жайық» пен «Ақтөбе» алаңға шықты.
«Жайықтың» бас бапкері Виктор Козиктің Қазақстан ұлттық құрамасын жаттықтыратыны белгілі.
Ал «Ақтөбе» тізгінін ұстап, осы маусымда кубок пен суперкубокты ұтып алған Сергей Трикоз еліміздің жастар құрамасына жетекшілік етіп келеді.
Қос бапкер де бүгінгі басты ойында тәжірибелі волейболшыларға сенім артты. Оралдықтардан команда капитаны Виталий Вориводин мен Владимир Прокофьев, «Ақтөбеден» Айбат Неталин, Дамир Әкімов, Надырхан Қадырханов ұлттық құрама сапында да өнер көрсетеді.
«Жайықтың» байланыстырушысы, украиналық Володимир Ковальчуктің жасы 40-та болса, оның «Ақтөбедегі» отандасы, Қазақстан біріншілігінде бірнеше команда құрамында чемпион атанған Роман Хандролин 42-де, ресейлік Кирилл Костыленко 43-те еді.
Тұрақты чемпионат барысында үш кездесудің екеуінде «Ақтөбе» басым болса, біреуінде «Жайық» жеңген еді.
Бұл жолы бірінші партияда ақтөбеліктер бірден 7:2 есебімен алға кетіп, шабуылмен бірге тосқауылды сәтті қоя білді — 25:15.
Екіншісінде алаң иелері дәл сондай есеппен қарымта қайтарды — 25:15.
Үшінші сет «Ақтөбенің» пайдасына шешілді — 25:19.
Матч барысында «Жайықтан» В.Ковальчукты тағы бір байланыстырушы, қазақстандық Умид Набиев алмастырды.
Оралдықтар төртінші партияда бірте-бірте күш алып, 19:14 есебімен алға шықты. Ақтөбеліктер де ойыншыларын ауыстырып, есепті қысқартты — 18:20. Бірақ «Жайықты» тоқтата алмады — 21:25.
Шешуші, бесінші сетте ресейлік Никита Швалев допты ойынға қосқан сәтте ақтөбеліктер 5:0 есебімен алда тұрған еді. Дәл осы кезде Владимир Прокофьевтің эйстері арқасында «Жайық» таразы басын теңестіріп қана қоймай, өзі алға кетті — 7:5. Есеп 14:13 болған мезетте төрешілер бейнежазбаны ұзақ қарап, шешуші ұпайды ақтөбеліктерге берді — 15:13. Қорытынды есеп — 3:2.
Ертең қос команда екінші финалдық кездесуін өткізеді.