ҚФФ мен халықаралық DUOL компаниясы Меморандумға қол қойды
ҚФФ мен халықаралық DUOL компаниясы еліміздегі спорттық инфрақұрылымды дамытуға бағытталған стратегиялық әріптестікті нығайту және заманауи шешімдерді ілгерілету мақсатында өзара түсіністік туралы Меморандумға қол қойды, деп хабарлайды Prosports.kz.
Бұл құжат ҚФФ-ның басым бағыттарының бірі – ел көлемінде сапалы, орнықты және қолжетімді футбол инфрақұрылымын дамыту жолындағы маңызды қадам болып отыр. Тараптар ұзақ мерзімді ынтымақтастыққа ниетті екендерін білдіріп, жаттығу мен жарыс өткізуге қолайлы жағдай жасауға мүмкіндік беретін озық технологияларды бірлесе енгізуге келісті.
DUOL компаниясы 1992 жылы құрылған және бүгінде үрлемелі және мембраналық құрылымдарды жобалау мен өндіру саласында Еуропадағы жетекші компаниялардың бірі ретінде танылған. 30 жылдан астам тәжірибесі бар компания әлемнің 50-ден астам елінде 2000-нан аса жобаны сәтті жүзеге асырып, спорт, өнеркәсіп және логистика салаларына арналған инновациялық әрі энергия үнемдейтін шешімдер ұсынуда сенімді серіктес ретінде танылып отыр.