Криштиану Роналду болашағы туралы мәлімдеме жасады
Сауд Арабиясының «Әл-Наср» клубының португалиялық шабуылшысы Криштиану Роналду спорттан кетуге жақын, деп хабарлайды Prosports.kz.
Teamtalk мәліметінше, 39 жастағы шабуылшы «Әл-Насрмен» келісімшарты аяқталғаннан кейін кәсіпқой карьерасын аяқтау туралы ойланып жүр. Сонымен қатар, Роналду өз елінде бір португалиялық клубпен соңғы келісімшарт жасасу мүмкіндігін де жоққа шығармайды.
Сауд Арабиясы командасы сапында Роналду 83 матчта 74 гол соғып, 18 нәтижелі пас берді.
«Әл-Наср» Сауд Про-лигасының турнир кестесінде 25 ұпаймен төртінші орында келеді. Чемпионатта 36 ұпаймен «Әл-Иттихад» көш бастап тұр.
Роналду отбасымен бірге Сауд Арабиясына 2023 жылы қаңтарда көшіп келді және сол кезден бері «Әл-Наср» сапында өнер көрсетеді. Елдегі еркек пен әйелдің некесіз бірге тұруына рұқсат берілмесе де, аңызға айналған футболшыға балаларының анасымен бірге тұруына бұл жағдайда арнайы рұқсат берілді.