Қазақстан құрамасы 2025 жылы бокстан екі әлем чемпионатына қатысады
Бокстан Қазақстан ерлер құрамасының бас бапкері Қайрат Сәтжанов ұлттық команданың 2025 жылға арналған жоспарларымен бөлісті.
«Спорт министрі» YouTube каналына сұхбат берген бапкердің айтуынша, келесі жылы қазақстандық боксшылар екі әлем чемпионатына қатысады. Оның алғашқысы IBA (Халықаралық бокс қауымдастығы) ұйымдастыруымен, екіншісі World Boxing тарапынан өтетін жаһан біріншілігі болмақ.
Жарыстарға дайындық аясында бірнеше оқу-жаттығу жиындары мен турнирлер жоспарланып отыр. Атап айтқанда, қаңтар айында Испанияда бірлескен жаттығу лагері өткізіліп, сол жерде халықаралық турнир ұйымдастырылады. Ақпанда Болгарияда дәстүрлі «Странджа кубогы» турнирі өтеді. Наурызда Ресейдің Кисловодск қаласында Ресей, Өзбекстан және Әзербайжан құрамаларымен бірлескен жаттығулар мен турнир жоспарланған.
IBA ұйымдастыратын әлем чемпионаты мамыр айында Түркияда өтеді. Бұрын бұл турнир Астанада өткізіледі деп жоспарланған еді. Дегенмен, жоспар өзгеріп кетті. Ал World Boxing чемпионаты қыркүйек айында алғаш рет жалауын желбіретеді.
Қайрат Сәтжанов барлық боксшылар осы турнирлер мен жаттығу жиындарына қатысатынын атап өтті. Сол бойынша ұлттық құраманың әр спортшысының қабілеттері бағаланып, жоспар құрылмақ.