Сауль Альварес пен Теренс Кроуфорд жекпе-жек өткізеді
Мексикалық боксшы Сауль «Канело» Альварес (62-2-2, 39 КО) екі салмақ дәрежесінде абсолютті әлем чемпионы болған америкалық Теренс Кроуфордпен (41-0, 31 КО) жұдырықтасады, деп хабарлайды Prosports.kz
AS мәліметінше, кездесу 3 мамыр күні Лас-Вегастағы T-Mobile аренада өтеді. Ал іс-шараның демеушісі – Riyadh Season мен Турки Әл аш-Шейх.
Бұған дейін Кроуфордтың өзі де «Канеломен» жұдырықтасудан кетәрі еместігін айтқан болатын. 15 қыркүйекте Сауль Альварес өз жерлесі Эдгар Берланганы жеңген кезде, Теренс оны айқасқа шақырған еді.
Кроуфорд соңғы рет тамыз айында рингке шыққан болатын. Ол кезде америкалық боксшы өзбек Исраил Мадримовті жеңіп, сарапқа салынған WBA белбеуін қанжығасына байлады. Сондай-ақ, ол осымен үшінші салмақ дәрежесінде әлем чемпионы атанып отыр.
Еске салайық, Сауль Альварес қазақстандық Геннадий Головкинмен үш рет жекпе-жек өткізіп, оның екеуінде жеңіске жетті де, бірінде тең ойнады.