Данияр Елеусінов Астанада жекпе-жек өткізбек
Данияр Елеусінов Астанада жекпе-жек өткізеді, деп хабарлайды Prosports.kz
Жартылай орта салмақта өнер көрсететін қазақстандық боксшы Данияр Елеусіновтің (12-0, 7 КО) келесі жекпе-жегінің қай күні өтетіні белгілі болды.
«Ресми: Данияр Елеусінов 28 ақпанда рингке қайта оралады», - деп мәлімдеді all.stars.boxing компаниясы өзінің инстаграм әлеуметтік желісінде.
Соңғы рет қазақстандық боксшы қыркүйек айында Алматыда өткен бокс кешінде өнер көрсетіп, бесінші раундта филиппиндік Джо Нойнаяны (23-5-2, 11 КО) мерзімінен бұрын жеңген болатын. Бұл жеңіс Елеусіновке екінші дәрежелі WBC Peace титулын иеленуге, сондай-ақ BoxRec рейтингінің үздік 15 боксшысы қатарына енуге мүмкіндік берді.
Айта кетейік, Елеусінов бокстан Қазақстаннан шыққан әзірге соңғы Олимпиада чемпионы. 2016 жылы былғары қолғап шебері Риода өткен ойындарда алтыннан алқа таққан болатын.