АПЛ-дағы ең бай клуб чемпионаттағы сәтсіздігін жалғастырып жатыр
Ағылшын Премьер-лигасының 18-турындағы «Манчестер Сити» мен «Эвертон» арасындағы матч аяқталды, деп хабарлайды Prosports.kz.
Командалар Манчестер қаласындағы «Этихад» стадионында ойнады. Матч 1:1 есебімен аяқталды.
14-минутта «Манчестер Сити» жартылай қорғаушысы Бернарду Силва есеп ашты. 36-минутта «Эвертон» шабуылшысы Илиман Ндиайе жауап голын соқты. 53-минутта алаң иелері шабуылшысы Эрлинг Холанд пенальтиді сәтсіз орындады, оның соққысын қақпашы Джордан Пикфорд қайтара алды.
Бұл «Манчестер Ситидің» Премьер-лигада қатарынан төртінші жеңіссіз ойны болды.
«Манчестер Сити» 2024/2025 жылғы Англия чемпионатының турнирлік кестесінде жетінші орында тұр. Команда 18 матчта 28 ұпай жинады. «Эвертон» 17 ойыннан кейін 17 ұпаймен 15-орында. Бірінші орында 16 матчтан кейін 39 ұпай жинаған «Ливерпуль» орналасқан.