12 матчта 8 ассист. «Шериф» жұлдызы ҚПЛ клубына ауыспақ
Буркина-Фасоның шабуылдаушы жартылай қорғаушысы, молдавалық «Шериф» ойыншысы Седрик Бадоло қазақстандық БАҚ-та таралған осы қыста «Ақтөбе» құрамына қосылуы мүмкін деген ақпаратқа қатысты Legalbet.kz сайтына пікір білдірді, деп хабарлайды Prosports.kz.
«Әзірге нақты білмеймін. Бұл клубпен мен туралы келіссөз жүріп жатыр ма? Бұл жөнінде аздаған ақпаратым бар. Егер нақты бір жаңалық болса, сіздерге хабарлаймын. Қазақстанда ойнау маған қызық па? Иә, ойнағым келеді», – деп жауап берді футболшы.
26 жастағы Бадоло «Шериф» сапында 2022 жылдың басынан бері өнер көрсетеді. Бұған дейін ол туған елі Буркина-Фасо клубтарынан бөлек, словакиялық «Погронье» және мароккалық «Кавкаб Марракеш» командаларында ойнаған. 2024/2025 жылғы Молдова чемпионатында 12 матчта 2 гол соғып, 8 нәтижелі пас берген. Буркина-Фасо ұлттық құрамасы сапында 26 матч өткізіп, 3 ассист жасаған.
Transfermarkt бұл ойыншыны қазіргі таңда 750 мың еуроға бағалайды.