Астанада 15 миллиард теңгеге стадион салынады
Астананың оң жағалауында Қ. Мұңайтпасов атындағы стадионның құрылысына 15 миллиард теңгеден астам қаражат жұмсалады, деп хабарлайды Prosports.kz тілшісі Kaztag.kz сайтына сілтеме жасап.
«Тапсырыс беруші – «Астана қаласының құрылыс басқармасы» мемлекеттік мекемесі; сипаттама – Астана қаласының «Сарыарқа» ауданында, Кенесары көшесі, 14 мекенжайында орналасатын Қ. Мұнайтпасов атындағы стадионның құрылысы; жоспарланған сома – 15 228 082 539,89 теңге», – деп жазылған мемлекеттік сатып алу сайтындағы лоттың сипаттамасында.
2024 жылдың 24 қыркүйегінде Индустрия және құрылыс министрлігі Қ. Мұнайтпасов атындағы стадион құрылысының жобалық құжаттамасын қарау қорытындысы бойынша «Мемсараптама» РМК оң қорытынды шығарғанын мәлімдеді.
Мемлекеттік сатып алу сайтында өтінімдер қабылдау 22 қазанда басталып, 6 қарашада аяқталды. Тендерді BiGlobal ЖШС жеңіп алды. Құрылыс алаңының жалпы аумағы 15 мың шаршы метрден асады. Стадион үш қабатты болады және 3600 адамды сыйдыра алады деп жоспарланып отыр. Жобаны 16 ай ішінде аяқтау көзделген.