Футболдан Қазақстан құрамасы Ұлттар лигасында қатарынан төртінші рет жеңіліп қалды
Бүгін футболдан Қазақстан құрамасы Ұлттар лигасының 5-туры аясында өз алаңында Австрия құрамасын қабылдады, деп хабарлайды Prosports.kz.
Алматыдағы Орталық стадионда өткен матч 0:2 есебімен аустриялықтардың пайдасына аяқталды.
Қонақтар сапында Кристоф Баумгартнер (15-минутта) және Михаэль Грегорич (25-минутта) голдың авторы атанды.
Матчтың 23-минутында Қазақстан құрамасының ойыншысы Александр Марочкин қызыл қағаз алды. Нәтижесінде алаң иелері ойынды 10 футболшымен жалғастыруға мәжбүр болды.
Айта кетейік, бұл Қазақстан құрамасының Ұлттар лигасындағы төртінші жеңілісі. Бұған дейін Станислав Черчесов шәкіттері Норвегия 0:0 есебімен тең түсті, Австрияға қарсы бірінші матчта 0:4 есебімен жеңіліп қалды және Словенияға екі рет жол берді - 0:3, 0:1.
Енді Қазақстан 17 қарашада топтық кезеңдегі соңғы ойынын өткізеді. Құрамамыз сырт алаңда Норвегиямен кездеседі.
Қазақстан — Австрия 0:2 (0:2)
Голдар: Баумгартнер 15, Грегорич 25.
Алаңнан қуылды: Марочкин 23.