World Boxing ұйымының АҚШ-та өткен әлем чемпионатында Даниял Райымбеков 85 келіде сынға түсті
World Boxing ұйымдастырған әлем чемпионатында күміс жүлдегер атанған қазақстандық Даниял Райымбеков жарыстың ерекшелігі туралы айтты, деп хабарлайды Prosports.kz
Құрылғанына көп уақыт болмаған World Boxing ұйымының АҚШ-та өткен әлем чемпионатында Даниял Райымбеков 85 келіде сынға түсті. Финалға дейін жеткен отандасымыз шешуші сында Уэльс спортшысы Томас Дэниэл Питке 5:0 есебімен жол берді.
«Жарыс деңгейі өте мықты болды. Жаңа технологияларды байқадық. Мәселен, былғары қолғапқа соққылардың санын есептеуге арналған құрылғы салады. Финалда ұтылуыма тактикалық дайындығымның аздығы себеп болды. Алдағы жоспарым – тек еңбек етіп, қателіктермен жұмыс істеп, мықты болып оралу. Келесі жылы Қазақстан чемпионатына тыңғылықты дайындалып, Азия чемпионаттарында еліме алтын жүлде сыйлағым келеді», - деді Даниял Nur.kz-ке берген сұхбатында.
World Boxing ұйымдастырған әлем чемпионаты 26 қазан мен 2 қараша аралығында өткен болатын. Аталған сынға әлемнің 30 елінен 180-ге жуық боксшы қатысты. Бұл ретте Қазақстан атынан 4 боксшы қатысты. Оның ішінде Асылхан Көшербай мен Даниял Райымбеков күміс жүлдеге ие болды.
World Boxing ұйымы 2023 жылдың сәуірінде құрылған. Жақында бұл қауымдастыққа Қазақстан бокс федерациясы да қосылды. Сондай-ақ, Қырғызстан мен Өзбекстан да аталған ұйымға мүшелікке өтті.