Шымкентте шахматтан әйелдер арасындағы беделді Гран-при басталды
Шымкентте KazChess/Қазақстан шахмат федерациясы Халықаралық шахмат федерациясының (ФИДЕ) және Freedom Holding Corp компаниясының қолдауымен ұйымдастырған әйелдер арасындағы 2024-2025 жылғы ФИДЕ Гран-приінің 2-кезеңі басталды, деп хабарлайды Prosports.kz тілшісі Sport+ сайтына сілтеме жасап.
Әйелдер арасындағы беделді турнирдің 2-кезеңіне қатысу үшін Шымкентке әлемнің үздік он шахматшысы келді, олардың арасында Қазақстан әйелдер құрамасының көшбасшысы – 45-шахмат Олимпиадасының күміс жүлдегері Бибісара Асаубаева да бар.
8 қарашаға дейін жалғасатын турнирдің тұсаукесері Rixos Khadisha Shymkent қонақүйінің салтанат залында өтті. Оның құрметті қонақтары ФИДЕ президенті Аркадий Дворкович, қала әкімінің бірінші орынбасары Қуаныш Асылов, турнирге қатысушылар, жоғары оқу орындарының ректорлары, танымал кәсіпкерлер, инфлюенсерлер және т.б. болды.