Премьер-лига ойындарын 1 миллионнан астам жанкүйер тамашалады
QFL ойындарын 1 миллионнан астам жанкүйер тамашалады, деп хабарлайды Prosports.kz
Осы маусымда Qazaqstan Football League барлық турниріндегі матчтарын бір миллионнан астам көрермен стадионнан көрген. 1 наурыз бен 6 қазан аралығында жалпы саны 1 003 942 адам еліміздегі стадиондарға ат басын бұрды. Осы маусымда Лига 8 турнир өткізуді қолға алды. Қазіргі сәтте QFL Премьер-лигасы, QFL Бірінші лигасы және QFL Лига кубогы әлі жалғасып жатыр.
Жанкүйерлердің басым көпшілігі QFL Премьер-лига аясындағы кездесулерге барған. Жоғарғы дивизиондағы матчтар 600 мыңға жуық адамды жинай алды. Одан кейін QFL Бірінші лигасына 125 мыңға жуық азамат қызығушылық танытқан. QFL Екінші лигасының ойындары да көрермендердің назарын аударып, 88 403 адам ойынды стадионнан көрді. Бұл көрсеткіш өткен маусымнан қарағанда екі есе жоғары.
QFL Қазақстан кубогы 96 мыңнан астам адамды қамтыса, жаңа турнир - QFL Лига кубогы ойындарына 93 мыңнан астам көрермен қолдау танытты. Отандық футболдың жанкүйерлердің назары әйелдер футболынан да тыс қалмады. QFL Әйелдер лигасы мен Әйелдер кубогы 4,5 мың адам жинады.
Айта кетейік, осы маусымда ел чемпионаты тарихында матчқа келген жанкүйерлер саны бойынша жаңа рекорд тіркелді. QFL Премьер-лигасының 5-ші тур аясында Алматының Орталық стадионында өткен «Қайрат» - «Ақтөбе» кездесуінде 22 804 адам қолдау танытты. Сонымен қатар «Атырау» - «Ақтөбе» арасында өткен QFL Қазақстан кубогының финалына 13 576 адам жиналып, ел тарихында финалдық ойынға ең көп жиналған ТОП-5 ойынның қатарына кірді.
Осы маусымда Qazaqstan Football League турнирлерінде ең көп жанкүйер жиналған матчтар:
1. «Қайрат» - «Ақтөбе» – 22 804 көрермен (20.04.2024, QFL Премьер-лигасы, 5 тур)
2. «Ордабасы» - «Ақтөбе» - 17 083 көрермен (08.05.2024, QFL Қазақстан кубогының ширек финалы)
3. «Қайрат» - «Астана» - 15 473 көрермен (01.09.2024, QFL Премьер-лигасы, 19 тур)
4. «Ордабасы» - «Астана» - 14 000 көрермен (22.09.2024, QFL Премьер-лигасы, 21 тур)
5. «Атырау» - «Ақтөбе» - 13 576 көрермен (29.09.2024, QFL Қазақстан кубогының финалы).