Түрік күресінен Қазақстан қоржынында үш күміс бар
Астанада өтіп жатқан V Дүниежүзілік көшпенділер ойындарының ашыртмалы аба гюреши қорытындыланып, марапаттау рәсімі өтті. Сайыс «Алау» мұз сарайында ұйымдастырылды, деп хабарлайды Prosports.kz тілшісі ҚазАқпаратқа сілтеме жасап.
«Жеңісті қатты сезініп тұрған жоқпын, екінші орын алғаныма қапаланып тұрмын. Алтын медаль алуға толық мүмкіндік болды, дегенмен түрік халқының күресі болған соң түрік қарсыласым басым болды. Шынымды айтсам, мен қатты дайындалған жоқпын, ашыртмалы аба гюрешинен алғаш бақ сынап тұрмын», - деді ашыртмалы аба гюреши ойындарының күміс жүлде иегері Әділет Ахметқали салтанатты марапаттау сәтінен кейін агенттік тілшісіне сұхбат беріп.
Оның айтуынша, ашыртмалы аба гюрешинің басқа күрес түрлерінен өз ережесімен ерекшеленеді. Спорттың бұл түрінен Түркия, Өзбекстан, Қырғызстан және Қазақстан командасы мықты саналады.
«Негізі мен дзюдошымын, кәсіби түрде 10 жыл айналысып келемін. Бұйырса, әлем чемпионы болғым келеді. Сол жолда еңбектенемін», - дейді ол.
Айта кетейік, ашыртмалы аба гюреши – түрік халқының ұлттық ойыны. Ақтық сында үш отандасымыз жүлде алды.
Ернұр Сүлеймен – күміс (60 келі);
Әділет Ахметғали – күміс (70 келі);
Айдос Ғалымов – күміс (90 келі).
Сыйақыға келсек, І орынға 500 мың теңге, ІІ орынға 300 мың теңге және үшінші орынға 200 мың теңге сертификаты табысталды.
Еске сала кетсек, V Дүниежүзілік көшпенділер ойындарының ашыртмалы аба гюрешине 19 мемлекеттен 74 спортшы бақ сынады.