IV қысқы жасөспірімдер олимпиадасы мәресіне жетті: Қазақстан құрамасы 20-орынға ие болды
![IV қысқы жасөспірімдер олимпиадасы мәресіне жетті: Қазақстан құрамасы 20-орынға ие болды](https://prosports.kz/upload/news/content//202402/201131_1f5bccab677657996c15168d40283a34.jpg?v=28700624)
Жасөспірімдердің ақ қар, көк мұз үстіндегі аламанында Қазақстан құрамасының 41 өкілі 5 спорт түрінің 9 бағдарламасы бойынша бақ сынады. Жарыс қорытындысы бойынша отандастарымыз 1 алтын, 2 қола медаль олжалап, жасөспірімдер олимпиадасы тарихындағы ең үздік көрсеткішке қол жеткізді. Нәтижесінде жерлестеріміз жалпыкомандалық есепте 20-орынға ие болды.
![Канвон-2024](https://kaz.zakon.kz/pbi/WEBP/2024-02-01/file-3c8656a8-3d4b-499e-a2d1-bcae679bdf88/800x533.webp)
Сурет: Туризм және спорт министрлігінің баспасөз қызметі
Канвон төріндегі Олимпиадада шаңғымен тұғырдан секіруде бәсекеге түскен Илья Мизерных 214 ұпай жинап, Қазақстан құрамасының қоржынына жасөпірімдер олимпиадасы тарихындағы алғашқы алтынды сыйласа, шорт-трекші Полина Омельчук пен шайбалы хоккейден (3×3) ұлттық құрама ойыншылары қола жүлдегер атанды. Хоккейшілеріміз қола жүлде үшін өткен тартысты матчта Аустрия құрамасынан 6:5 есебімен басым түсті.
![Канвон-2024](https://kaz.zakon.kz/pbi/WEBP/2024-02-01/file-eaba8604-e9f1-4b36-aa2a-2c0d3443ca87/800x533.webp)
Сурет: Туризм және спорт министрлігінің баспасөз қызметі
Тәуелсіздік жылдарында Қазақстан спортшылары үш қысқы жасөспірімдер олимпиадасына қатысып, 5 медаль жеңіп алған болатын. 2012 жылғы Инсбруктегі (Аустрия) Олимпиадада отандастарымыз 1 күміс, 2 қола олжаласа, Лиллехаммерде (Норвегия) екі қоламен шектелген еді. Осыдан 4 жыл бұрын Лозаннада (Швейцария) өткен ойындарда өкінішке қарай, құрама қоржыны бос қайтты.