Нұрбек Ғазез әлем чемпионы Лян Юшуайдан ұтылып қалды
<span>Әзірбайжан астанасы Бакуде өтіп жатқан таеквондодан 26-шы әлем чемпионының 4-жарыс күні өтіп жатыр. Жарыс жолына Ұлттық құрама сапынан Нұрбек Ғазез (63 кг) бен Ракони Бимырза (+73 кг) шықты.</span>
<span>Нұрбек Ғазез бразилиялық Эдуардо Бареттаны ойсырата ұтып, бәсекені жақсы-ақ бастаған. Айқас кезінде қарсыласқа жойқын соққылар жасап, нокдаунға түсірді. Алайда 2-айналымында қазіргі әлем чемпионы, Азия чемпионатының күміс жүлдегері, қытайлық Лян Юшуайдан ұтылып қалды. Нұрбек пен Лян осыған дейін биыл Ломмель қаласында өткен Бельгия ашық чемпионатында кездескендн қытайлық басым түскен. Сондай-ақ Лян Юшуай былтыр құрлық чемпионатында тағы бір отандасымыз Әділет Базарбаевты ұтып, финалға шыққан.</span>
<span>Ал аса ауыр салмақтағы Ракони Бимырза 1-айналымда Еуропа чемпионы, Гран-при бәсекесінің 2 дүркін жеңімпазы, польшалық Александра Ковальчукке қауқар таныта алған жоқ. Есеп: 0-2.</span>
<span>Ертең даянға шықатын таеквондошылар арасында қазақстандықтардан Рита Бакишева (46 кг) мен Жавохирхон Исламов (54 кг) бар.</span>
<span>Жалпы биылғы додаға 145 елден мыңға тарта таеквондошы жиналды. Айта кетейік, Бакуде өтіп жатқаны таеквондодан XXVI әлем чемпионаты. Биылғы дода Халықаралық таеквондо федерацясының 50 жылдығымен тұспа-тұс келіп тұр. Алдағы аптада мұнда Париж Олимпиадасына қажет ұпайлар сарапқа салынады. Бұл спортта рейтингі ең жоғары бәсеке – Олимпия ойындары (G20). Одан кейін әлем чемпионаты (G14), Гран-придің финалы (G10) мен Гран-при санатындағы жарыстар (G6) тұр. Әлем чемпионы 140 балл алса, күміс жүлде үшін 84, қолаға 50 ұпай беріледі.</span>