«Келесі жекпе-жек Түркияда өтеді»: Еділ Қожамбердиев рингке оралатын күнін жариялады
Қазақстандық кәсіпқой боксшы Еділ Қожамбердиев (11-2, 11КО) Prosports.kz тілшісіне берген сұхбатында келесі жекпе-жегінің өтетін күнін атап, Шавкат Рахмонов пен Джефф Нил арасындағы жекпе-жекке болжамын айтты.
– Еділ, рингке шықпағаныңызға бір жылдан асты. Келесі жекпе-жекті қашан өткізуді жоспарлап отырсыз?
– Бастапқыда менің жекпе-жегім 18 наурызға Стамбулда (Түркия) жоспарланған болатын. Бірақ соңғы оқиғаларға байланысты бокс кеші 30 сәуірге шегерілді. Қазір командамен сол уақытқа дайындалып жатырмыз. Жекпе-жек он раундқа есептелген, WBC аймақтық белбеуі сарапқа салынады.
– Жекпе-жектеріңіздің көбі Қазақстанда өтті. Шетелдік промоутерлермен байланысу жоспары бар ма?
– Қазақстанда пандемия кезінде саяхаттауға тыйым салынғандықтан өнер көрсеттік. Бұған дейін мен Америкада төрт рет, Мексика мен Ресейде жұдырықтастым. Құдай қаласа, 30 сәуірде Түркияда өнер көрсетеміз.
— Поп-ММА мен поп-бокс туралы не ойлайсыз? Сізді бұл форматта көруіміз мүмкін бе?
– Бұл формат елімізде де, шетелде де қарқынды дамып келеді. Поп-ММА және поп-бокста өнер көрсету ұсыныстары түсті. Бірақ қазір басқа жоспарларым бар. Мүмкін, болашақта поп-бокста көресіздер.
– Қазір бірінші ауыр салмақта болашағы зор бірнеше қазақстандық өнер көрсетеді: Қамшыбек Құнқабаев, Серік Мұсаділов. Олардың болашағы туралы не айта аласыз?
— Қамшыбек әуесқой мен кәсіпқой боксты сәтті үйлестіреді. Бір кардта бірнеше рет өнер көрсеттік. Оның болашағы зор деп айта аламын.
Серік те мықты боксшы, қазір қарқын алып келеді. Әр жекпе-жек сайын оның деңгейі өсіп келеді. Ол тек Штаттарда жекпе-жек өткізеді.
- Осы демалыс күндері UFC 285 турнирінде қазақстандық Шавкат Рахмонов америкалық Джефф Нилмен кездеседі. Бұл жекпе-жекке болжамыңыз қандай?
– Шавкаттың Нилді мерзімінен бұрын жеңуге мүмкіндігі көп. Мерзімінен бұрын болмаса да, ұпайлар санымен. Рахмоновпен жеке таныспыз, UFC-мен келісімшарт жасаспай тұрып біз бірге жұдырықтастық, спаррингтер өткіздік. Оның алдағы жекпе-жегіне болжамым: Шавкат мерзімінен бұрын жеңіске жетеді.