Нұрдәулет Қуанышбай: Чемпионат артта қалды, ендігі мақсатым - ел біріншілігінде топ жару

Нұрдәулет Қуанышбай: Чемпионат артта қалды, ендігі мақсатым - ел біріншілігінде топ жару

Уфада өткен жастар арасындағы әлем чемпионатында еркін күрес шебері Нұрдәулет Қуанышбай күміс жүлдегер атанды. Барлық қарсыласынан басым түсіп, финалда америкалық балуанға есе жіберген Нұрдәулет Olympic.kz сайтына сұхбат берді.

"Әлем чемпионатындағы әрбір кездесуім де оңай өткен жоқ. Ең қиын жекпе-жек үнділік балуанға қарсы өтті. Қуанышқа қарай, төзім мен мінездің арқасында үндістандық спортшыдан басым түстім.

Ал ақтық сынға мен жүз пайыз дайындықпен шықтым. Жігерім де, намысым да жанып тұрды. Бірақ қарсылас қарымды екен, ұту мүмкін болмады. Енді мұнымен тоқтап қалмаймын. 23 жасқа дейінгі жастар арасындағы әлем біріншілігіне қатысамын. Одан бөлек, ел чемпионатына қатысуды жоспарлап отырмын.

74 келі салмақта Нұрғожа Қайпанов, Данияр Қайсанов сынды ағаларымыз бар. Ұлттық құрамаға шақырту алу үшін алдымен ел чемпионатында өзіңді дәлелдеуің қажет. Менің мақсатым да осы.

Негізі, мен 4 сыныпқа дейін бокспен айналыстым. Кейін денсаулық жағдайыма байланысты екі жыл спорттан алшақтап кеткен едім. Үйдегі інімнің еркін күреске қатысып жүргеніне қызығып, балуандық өнерге аяқ бастым. Осылайша, бокстан да, күрестен де хабары бар спортшылар қатарына қосылдым", - дейді Нұрдәулет

Ошибка в тексте? Выделите и нажмите Ctrl+Enter
Пікірлер 0