Науатбек: Тамаша көңіл күймен жаттығуды бастауға дайынбыз

<span>Дзюдодан Қазақстан әйелдер құрамасы Алматы облысында оқу-жаттығу жиындарын өткізіп жатыр. Команда мүшесі Ақмарал Науатбек ұзақ үзілістен кейінгі алғашқы жаттығу жиынының қалай өтіп жатқаны туралы айтты.  </span>

<span>- Бұл біздің ұзақ үзілістен кейінгі алғашқы оқу-жаттығу жиынымыз. Жиын басталған күні бәріміз ПТР-тестін тапсырып,  бес күн карантин аймағында болдық. Ұлттық құрама мүшесінің барлығының тест нәтижесі таза болып шықты. </span>

<span>Толық жаттығуымызға бүгін кірісеміз. Жоспар бойынша жаттығу жиыны 22 қарашаға дейін жалғасады. Жаттығу мақсаты Азия чемпионатына дайындалу болатын. Алайда, қазірге дейін құрлықтық біріншіліктің нақты өту-өтпейтіні белгісіз. Осы уақытқа дейін жаттығу жиына белгілі бір мақсатпен қатысып, жарысқа жоспарлы түрде дайындалсақ, қазір белгісіздік салдарынан мақсатсыз жұмыс істеу қиынға соғып тұр. </span>

<span>Десе де, карантин режимінде жаттығуды, команданы сағынып қалғанымыз рас. Қазір бәріміз аман-есен қауышып, мауқымызды басып жатырмыз. Тамаша көңіл күймен жаттығу жиынын бастауға дайынбыз, - дейді дзюдошы Ақмарал.</span>