Елдос Жұмақанов: Карантин аяқталған соң бапкерлер жоспарымен жаттығуды жалғастырамыз
Қазақстан Үкіметі коронавирус індеті бәсеңдесе, 11 мамырдан бастап елде төтенше жағдай режимі алынып, карантин шараларының жеңілдетілетінін хабарлады. Осыған байланысты, спорттық шаралар әрі қарай жалғасын табуы мүмкін.
Карантин режимін қатаң сақтанған #TeamKZ мүшелері төтенше жағдайдан кейін де сақ болатынын жасырмауда. Атап айтқанда, дзюдошы Елдос Жұмақанов қауіп сейілді дегеннің өзінде денсаулыққа мән беріп, бапкерлер құрамының кеңесімен, жоспарға сай жаттығуды жалғастыратынын айтты.
– Егер карантин аяқталып, жаттығу жиындарын өткізуге рұқсат берілсе, ұлттық құрама бапкерлерінің жоспарына сәйкес жаттығуды жалғастырамыз. Төтенше жағдай режимінде үй жағдайында барынша жаттығып, жаттығуды тоқтатқан жоқпықпыз.
Ендігі мақсат - 2021 жылы Токиода өтетін Олимпиада ойындарына тыңғылықты дайындалу. Бір жыл бойы барымызды салып, жақсы нәтижеге қол жеткіземіз деп ойлаймын", - дейді дзюдошы Елдос.
Айта кетерлігі, дзюдодан ұлттық құраманың бас бапкері Айдын Смағұлов "карантин мерзімі аяқталаса, 21 мамырдан бастап Шымкентте оқу-жаттығу жиынын бастаймыз деп жоспарлап отырмыз" деген болатын.
