Тұңғыш рет чемпион атанған. «Динамо-Брест» қандай клуб?

«Астананың» Чемпиондар лигасы алғашқы іріктеу кезеңіндегі қарсыласы белгілі болды. Елордалық клуб еуросапарын беларусьтік «Динамо-Брест» клубына қарсы бастайды. Бұл қандай клуб? Prosports.kz тілшісі бресттік клуб туралы баяндайды.

Тоқырау алдында тұрған

«Динамо-Брест» 1960 жылы құрылған. Алғашқы атауы - «Спартак». Бұл атаумен клуб 12 жыл бойы ойнайды. Кейін үш жыл «Буг» деген атаумен өнер көрсетеді. 1976 жылы клубтың атауы «Динамо» деп өзгертіледі. Мұндай атаумен бресттік клуб 36 жыл бойы ойнаған. 2012 жылдан бері ресми атауы - «Динамо-Брест».

КСРО кезінде беларусьтік клуб үлкен жетістіктерімен мақтана алмады. Команда төрт маусым ғана КСРО Бірінші лигасында ойнаған. Ал қалған уақытта екінші лигада бақ сынасқан.

Клубтың екінші лигада да ауыз толтырып айтарлықтай жетістігі жоқ. Тек 1968 жылы үшінші орын, 1976 жылы екінші орын алған. КСРО кубогында да жетістігі мәз емес, ең ұзаққа барғаны - 1/16 финал.

Беларусь тәуелсіздік алғаннан кейінгі алғашқы ішкі чемпионатта «Динамо-Брест» қола жүлдеге қол жеткізген. Содан бері тұрақты түрде жоғары лигада ойнап жүргенімен, нәтижелері көңіл көншітпеген. 2016 жылға дейін ең үздік нәтижесі - 5-орын.

2016 жылы команданы БАӘ-нің «Sohra Overseas» деген компаниясы сатып алған. Клубтың ендігі қожайыны - беларусьтік Александр Зайцев. Себебі 2010-жылдары клуб қаржылық тоқырауға ұшырап, қарызға батып, төменгі лигаға түсу алдында тұрған. Беларусьтік кәсіпкер бала кезінен «Динамоның» жанкүйері болғандықтан, сүйікті клубын құтқаруға тырысқан.

Осылайша, былтыр «Динамо-Брест» тарихында тұңғыш рет Беларусь чемпионы атанды. Одан бөлек, клуб тарихында үш кубок бар. 2006/2007, 2016/2017 және 2017/2018 жылғы маусымдарда бресттік клуб ел кубогын еншілеген.

Сонымен қатар, клуб қоржынында үш ел Суперкубогы бар. Өз алаңындағы матчтарын 10 169 адам сыятын «Брестский» стадионында өткізеді.

Ел кубогын еншілегеннен кейінгі жылдары «Динамо-Брест» еурокубоктарға қатысқан. Еуркубоктағы дебюті 2007 жылы болды. Сол жылы команда УЕФА кубогының 1-іріктеу кезеңінде латвиялық «Металлург» клубынан жеңіліп қалған - 2:3.

Кейін 2017/18 жылғы маусымда команда Еуропа лигасын 2-іріктеу кезеңінен бастаған. Бірақ бірден австриялық «Альтахқа» екі матч қорытындысы бойынша 1:4 есебімен есе жіберген.