ҚПЛ. Дөрекі «Тобыл», үмітсіз «Ақтөбе», қырағы «Қайрат»
Қазақстан Премьер-лигасының үшінші, шешуші айналымы басталды. Чемпионаттағы барлық командалардың бәрі бір-бірімен кездесіп болған соң 2019 жылдың жеңімпазы анықталады.
Үшінші айналымның алғашқы туры ел чемпиондары «Астанасыз» өтті. Еурокубокқа қатысып жатқанына байланысты елордалықтар Кәсіпқой футбол лигасынан «Атыраумен» болатын ойынды кейінге шегеруді өтінді. Олар рұқсатын берді. «Атырау» да қарсы болмай, келісе кетті.
23-турдың барлық матчтары 19 жасында дүниеден озған «Оқжетпестің» ойыншысы Роман Зюзиннің құрметіне арналған үнсіздікпен басталды.
Алғашқы матчта «Ордабасы» Көкшетауда жергілікті «Оқжетпестің» сау-тамтығын қалдырмады. Шымкенттіктер Андрей Карпович баптайтын команданың қақпасына жауапсыз 4 гол соқты. Көкшеліктер қорғаныста сауатты ойнап, қарымта шабуылдарда қарсылас аямайтын «Ордабасы» секілді команда үшін өте ыңғайлы қарсылас. «Оқжетпестің» қорғаныс шебі осал. Бір ғана мысал, осы маусымда бұл команда тек 4 ойында қақпасына доп дарытпапты.
«Ордабасы» болса маусымда алғаш рет 4 гол соқты. Мамыр айынан бері тұңғыш рет ірі жеңісіне қол жеткізді. Кахабер Цхададзе командасы мен үшінші орындағы «Астананы» бір ұпай ғана бөліп тұр.
Көшбасшы командалардың бірі - «Тобыл» Павлодарда ұпай жоғалтты. Екінші айналымның соңында, яғни, өткен турда кос команда дәл осы Павлодардағы стадионда кездескен еді. Қостанайлықтар екі доп басымдылығымен қарсыласынан оңай айла асырған болатын. Бұл жолы командалар тең тарқасты. 94 минутқа созылған матчтан гөрі, кездесу соңындағы қақтығыс есте қалды. Негізі, «Тобыл» футболшылары жиі дөрекілік танытты. Бас қазы Асхат Абданбаев кейбір сәттерде қостанайлықтардың ашық дөрекілігін жазаламай жатты. Соның салдары - ойын соңындағы 30 секундқа созылған қақтығысқа әкеп соқты. Нәтижесінде бірнеше футболшы сары қағазбен «марапатталды».
Алматылық «Қайрат» қонақта «Таразды» жеңіп, бірінші орынға шықты. Алексей Шпилевский командасына жеңіс оңайлықпен келген жоқ. «Не бел, не белбеу кетеді» деп, ҚПЛ-да қалу үшін таласып жүрген «Тараз» алматылықтарға айтарлықтай қарсылық танытты. Әйткенмен, екінші таймда Адеринсола Эсеола мен Бауыржан Исламхан «Қайратқа» жеңісті алып келді. Алматылықтар ҚПЛ-дың көшін бастады. «Тобылдан» бір, «Астанадан» үш ұпай озып тұр. Бірақ, чемпиондардың бір матчқа кем өткізгенін ескере кеткен жөн.
«Жетісу» — «Ақтөбе» 5:0 (2:0)
Голдар: Айбар Жақсылықов 11, 65, Камо Оганесян 30, Мантас Куклис 69, Никита Наумов 80 (5:0).
23-турда чемпионаттағы ең ірі есеп тіркелді. Соңғы ойындарда қарсылас шақ келтірмей жүрген «Жетісу» «Ақтөбенің» қақпасына бес гол соқты. 22 жастағы шас шабуылшы Айбар Жақсылықов дубль авторы атанды. «Ақтөбе» ойыншылары өз қақпаларыңа кірген екінші голдан кейін қарсылық танытуды қойды. «Ақ-қызылдармен» қоштаса беруге болатын секілді. Бұл команда төртінші ойын қатарынан жеңілді. 10-11-ші орындарды бөлісіп тұрған «Ертіс» және «Тараздан» 14 ұпай қалып тұр. Чемпионаттың аяқталуына 10 тур қалды.
«Шахтер» - «Қайсар» - 3:0(0:0)
Голдар: Доньет Шкодра 52, Еркебұлан Нұрғалиев 61, Сергей Зенев 74
Турдың соңғы ойынында кестедегі көрші командалар - «Шахтер» мен «Қайсар» кездесті. Алғашқы екі айналымдағы екі матчта да «кеншілер» «Қайсарды» бір ұта алмай қойған. Бірінші таймда командалар тең дәрежелі ойын өрнегін көрсетті. Жанкүйерлер үшін іш пыстырарлық ойын болды. Ал матчтың екінші бөлігінде алаң қожайындары 20 минуттың ішінде үш доп соғып, кездесу тағдырын шешіп тастады. Өз қақпаларыңа «Астана» мен «Қайраттан» ғана екі доптан артық өткізетін «қасқырлар», өз дәстүрін осы турда бұзды. Сонымен қатар, бесінші орынға «Жетісуды» жіберіп, алтыншы сатыға сырғыды. Ал жетінші орынды қанағат тұтып тұрған «Шахтер» болса, «Қайсардан» төрт ұпайға қалып келеді.
Комментарии