Копа Америка. Кубок кімге бұйырады?

15 маусым күні елорда уақыты бойынша таңғы сағат 06:30-да Бразилияда Америка кубогы басталады. Дәлірек айтқанда Оңтүстік Америка кубогы. Дегенмен, бір қызығы Азиядан аталмыш жарысқа екі команда шақырылыпты. Катар немесе Жапония Америка кубогында жеңіп кетсе, қалған Оңтүстік Америкалық он қатысушы ұжым ұяттан кіретін тесік таппайтын шығар.

Қиял ғой, әрине. Алаң қожайындары Бразилия, Месси бастаған Аргентина, Суарес пен Каваниі бар Уругвай тұрғанда азиялықтарға кубокты кім беріпті. Жапония мен Катар Азия құрлықтарының үздіктері болған, жарысқа қонақ ретінде шақырылып отыр.

Турнирге бар болғаны 12 команда ғана қатысады. Олар төрт-төрттен үш топқа бөлінген. Әр топтан алғашқы екі орынды иемденген командалар мен үшінші орынды алған екі үздік команда ширек финалға жолдама алады.

«A» тобы

Бразилия, Боливия, Венесуэла, Перу

«B» тобы

Аргентина, Колумбия, Парагвай, Катар

«С» тобы

Уругвай, Эквадор, Жапония, Чили

Жарыстың қожайыны әрі ең басты фавориті Бразилияның жарқын жұлдызы Неймар жақында жарақат алып қалған еді. Әйткенмен, басы даудан арылмайтын футболшысыз да пентакампеондардың құрамы өте мықты. Неймардың орнына алғашқы тізімнен тыс қалған Виллиан шақыртылды. Бір футболшының төңірегінде команда құрудың дәуірі өткендігін әлем футболындағы соңғы нәтижелер айқын аңғартады. Сондықтан, Бразилия ұжым болып, турнирде топ жарамыз деп алдына бекем мақсат қойса, ешбір команда әлемнің бес дүркін чемпиондарына қарсылық көрсете алмайды.

Осыған дейін, Бразилия жерінде төрт мәрте Америка кубогы өткен екен. Төртеуінде де «селесао» қарсыластарын кубоксыз қайтарған.

Аталмыш жарыста жолы болмай жүрген құрама - Аргентина. Соңғы екі турнирде Месси капитан қызметін атқарған команда финалда есе жіберді. Осы жылы да Аргентинаны ешкім фаворит санап отырған жоқ. Дегенмен, Алтын допқа таластағы басты қарсыласы Вирджил ван Дейктің «Ливерпульмен» Чемпиондар лигасын жеңіуі, Роналдудың өз ұлттық құрамасын Ұлттар лигасында алға жетелеуі аргентиналыққа керемет мотивация болған шығар. Оның үстіне турнир барысында Месси 32 жасқа толады. Ұлттық құрамамен жетістікке жететін соңғы мүмкіндігі ау осы турнир.

Тартыстың көкесі «C» тобында болғалы тұр. Чили Америка кубогының жеңімпазы. Қатарынан екі мәрте жеңіске жетіп, кубокты иемденіп алды. Бірақ чили футболында қазір үлкен дағдарыс. Чилидің екі дүркін чемпион атануына түбегейлі үлес қосқан Артуро Видаль, Николас Кастильо, Гари Медель, Гонсало Хара секілді футболшылар біраз жасқа келді. Алексис Санчестің соңғы кездегі «футболы» бәріне мәлім. Сондықтан, чемпиондық атақты қорғамақ түгілі, жартылай финалға жетудің өзі Чили үшін жетістік болып саналар еді.