Дәулет Ниязбеков қызылордалықтардың үмітін ақтай алмады
Шымкентте күрес түрлерінен Қазақстан чемпионаты аяқталды. Жарысты әдеттегідей еркін күрес шеберлері аяқтап, боз кілемде кім мықтыны анықтады. Биылғы ел чемпионатында күтпеген нәтижелер көп тіркелді. Оған қоса, бұл біріншіліктің ерекшелігі Джакартада өтетін Азия ойындарына іріктеу жарысы болып саналады. Сол себепті басты назар олимпиадалық (57, 65, 74, 86, 97, 125 кг ) салмақтарда болды десек артық айтпаған болармыз.
Ақсу өңірінің балуаны Жандос Исмаилов 57 келіде барлық қарсыластаарын қоғадай жапырды. Азия чемпионаты мен Ислам ойындарының жүлдегері Жандос Исмаилов тұңғыш рет ел чемпионы атанды. Финалда оңтүстікқазақстандық Бердах Пірімбаевты өзінің сүйікті «лампочка» әдісіне алып, қарсыласын ұйықтатып жіберді. Айта кететін жайт, дәл осы әдісін Жандос барлық қарсыластарына үнемі жасайды. Оған Азия чемпионатындағы ирандық баланның да есінен танып қалған сәті дәлел.
57 кг:1. Жандос Исмаилов2. Пірімбаев Бердах3. Бисенов Дархан3. Иристаев Жавохир
Бішкек төрінде топ жарып, құрлық чемпионы атанған Нұрислам Санаев күтпеген жерден екінші айналымда Владимир Кудриннен ұтылып қалды. Кездесу барысында 5:0 есебімен ұтып жатқан ақтөбелік споршы босаңсып, Владимирдің шабуылын жіберіп алды. Нәтижесінде, 8:5 есебімен ұтылды. Санаевтан кейін 61 келіде фаворит саналған шығысқазақстандық балуан Расул Қалиев жартылай финалда Қуат Әміртаевтан сүрінді. Кездесуде жеңіске жетіп жатұан Қалиев соңғы секундтарда жеңісті уысынан жіберіп алды. Нәтижесінде, финалда Қуат Әміртаев финалда Владимир Кудринді ұтып чемпион атанса, Қалиев пен Санаев үшінші орынды иеленді.
61кг:1. Қуат Әміртаев2. Владимир Кудрин 3. Санаев Нұрислам3. Расул Қалиев
65 келіде ұлттық құраманың капитаны Дәулет Ниязбеков Қызылордадан келген жанкүйерлерін қуанта алмады. Мамандар болжағандай бұл салмақтың ақтық белдесуі керекулік Саятбек Оқасов пен Дәулет Ниязбеков арасында өтті. Өз тобында Бек Жақсылықов, Бурхан Мадияр сынды жас балуандардан қиыншылық көрген үш дүркін Азия чемпионы және әлем чемпионатының қола жүлдегері ақтық айқаста Баянауылдың білекті баласы – Саятбек Оқасовтың мықтылығын мойындады.
65 кг:1. Саятбек Оқасов2. Дәулет Ниязбеков3. Бурхан Мадияр3. Қуаныш Жақсыбай
70 келіде ақтөбелік Амандық Бакеев финалда Дәурен Жұмағазиевті ұтып, топ жарды. Амандық пен Дәурен бір-бірін жақсы білетін балуандар. Тіпті, осы жарыс алдында бұл екі балуан еркін күрес академиясында бірге жаттықты. Дәурен жартылай финалда осы салмақтың көшбасшысы Мейіржан Ашировты тізе бүктірді. Ал Дәурен Жұмағазиевтің осы жарысқа тек екі апта жаттықанын айта кеткен де жөн болар.
70 кг1. Амандық Бакеев2. Дәурен Жұмағазиев3. Мейіржан Аширов3. Мұсабеков Қанат
Күрес жанкүйерлері асыға күткен 74 келіде фавориттер көп еді. Еліміздің бетке ұстар балуандарымыздың бірі Ақжүрек Таңатаров та осы салмаққа шығады деп күтілген. Алайда жамбылдық балуан жарысқа тек құрметті қонақ ретінде келді. Ел чемпионатының бірнеше дүркін жүлдегері, Ислам ойындарының қола жүлдегері Болат Сақаев, әлем чемпионатының күміс жүлдегері Нұрлан Бекжанов, Азия чемпионатының жүлдегерлері Жігер Закиров пен Данияр Қайсановтар бұл салмақтағы бас жүлдені сарапқа салды. Соңғы Азия чемпионатында намыс пен жігердің арқасында үшінші орынды иеленген семейлік Данияр Қайсанов осы салмақтағы жаңа көшбасшы екеніне көзіміз жетті. Жартылай финалда Болат Сақаевты жеңіп, ақтық сында маңғыстаулық Жігер Закировты 10:4 есебімен ұтқан Данияр ел чемпионатының алтынын қанжығасына байлады. Бұған дейін Қайсанов тек үш рет қола медаль иеленген болатын.
74 кг:1. Данияр Қайсанов2. Жігер Закиров3. Болат Сақаев3. Нұрлан Бекжанов
79 келіде талай жылдар жүлдегер атанып жүрген Сәкен Айтжановтың бұл додада жолы болды. Ақтық айқаста Сәкен Бақтияр Ізбасаровты ұтты. Ал Рио Олимпиадасының қатысушысы Ғалымжан Өсербев қоланы қанағат тұтты.
79-кг 1. Сәкен Айтжанов 2. Бахтияр Ізбасаров 3. Ғалымжан Өсербаев 3. Айдар Балтамбаев
Қазіргі ұлттық құраманың басты жұлдыздарының бірі. Күресі әлемдік деңгейге татитын балуанымыз, Азия чемпионатының екі дүркін жүлдегері, жастар арасындағы әлем чемпионатының екі дүркін жүлдегері Азамат Дәулетбеков пен соңғы Азия чемпионатының күміс жүлдегері Әділет Дауланбаев финалда кездесті. Бұл техника мен намыстың, қылыш пен жігердің теке-тіресі еді. Күресі әдемі әрі техникалық айла-әдістерге толы Азамат пен Әділеттің кездесуі 6:6 есебімен аяқталды. Алайда, күрес әдісіне қарай жеңіс Әділетке бұйырды.
86 кг1. Адилет Давлумбаев2. Азамат Даулетбеков3. Нурдаудет Көктеубаев3. Эльхан Асадов
92 келіде мамандар Илизхан Чилаев чемпион болады деп күткен еді. Алайда, еркін күрес академиясында жаттығып жүрген жас балуан Нұрғайыпұлы Нұрғали керемет күрес көрсетіп, ел чемпионы атанды. Ақтық сында Илизхан Нұрғалидің шабуылдарына төтеп бере алмады. Нәтижесінде, Алматы облысының тумасы Нұрғайыпұлы Нұрғали чемпион атанды.
92 кг:1. Нұрғайыпұлы Нұрғали2. Илизхан Чилаев3. Азов Нұрсултан3. Ислам Азизов
97 келіде Жапония астанасы Токиода оқып жүрген шымкенттік Әлментай Бақдәулетке бас жүлде бұйырды. Финалда Бақдәулет Ералы Абдрашевті соңғы ұпай арқасында ұтты. Айта кетер жайт, финалдық белдесуден соң оңтүстікқазақстандық балуан көз жасына ерік берді. Себебі бір апта бұрын Бақдәулеттің әкесі өмірден озған болатын. Осындай қиыншылыққа қарамастан Әлментай Бақдәулет жарысқа қатысып ғана қоймай, чемпион атанды.
97кг:1. Әлментай Бақдәулет 2. Ералы Абдрашев3. Мамед Ибрагимов3. Бахытханов Серік
125 келіде финалдық белдесу барлық жүлдегерлер тізімін өзгертті. Олег Болтин мен Ермұхаммед Іңкәр арасындағы кездесу соңы төбелеске ұласты. Нақтырақ айтқанда, Ермұхаммед қарсыласын бірнеше рет ұрып, жарыстан шеттетілді. Ал үшінші орын үшін белдесуде Дәулет Шабанбайды таза жеңіспен ұтқан Бөлтіріков Думан күтпеген жерден қола емес күміс жүлдегер атанып кетті.
125 кг:1. Олег Болтин 2. Бөлтіріков Думан3. Дәулет Шабанбай3. Ғани Измағамбетов
Комментарии