Мемлекет басшысы мемлекеттік наградалар мен сыйлықтар тапсырды

Бүгiн Ақордада Қазақстан Тәуелсiздiгi күнiне орай Мемлекет басшысы Нұрсұлтан Назарбаев ерен еңбегiмен ерекшеленген бірнеше азаматтарды марапаттады.

Марапаттау рәсімінде Нұрсұлтан Назарбаев еліміздің басты мерекесі – Тәуелсіздік күнімен құттықтап, егеменді ел ретінде дамыған жылдарымыздағы бірқатар жетістіктерді атап өтті.

– Мемлекеттік егемендікке ие болған соң біз мықты әрі өркендеу жолына түскен Қазақстанды құруға кірістік. Осы жылдар ішінде еліміз көптеген елеулі жетістіктер мен жеңістерге қол жеткізді. Ауқымды жаңғыру үдерісі аясында азаматтарымызға жоғары әлеуметтік кепілдік беріп, әл-ауқатының артуын қамтамасыз еттік. Біз Қазақстанның халықаралық беделін нығайтып, жаһандық деңгейдегі ауқымды іс-шараларды лайықты өткіздік, – деді Елбасы.

Марапатталғандардың қатарында қазақтан шыққан тұңғыш Олимпиада чемпионы, «Жақсылық» ШҚ басшысы Жақсылық Үшкемпіров те болды. Мәскеу Олимпиадасының чемпионы Мемлекет басшысы қолынан «Қазақстанның Еңбек Ері» атағымен марапатталды.

«Жақсылық Үшкемпіровты бәріңіз білесіздер, ол даңқты палуан, дүниежүзі және Олимпиада ойындарының чемпионы. Халқымыздың атын сол кезден танытып келе жатқан азамат. Бүгінгi күнi ірі шаруашылығын басқарып, ауылды өркендетуге еңбегін 20 жылдан бері сіңірiп келе жатыр. Өзі басқаратын шаруашылықты жоғары дәрежеге жеткізді. Ол шығаратын ет бүгінде Ресей, Қырғызстанға, шетелдерге сатылуда. Елдің арасында абыройы үлкен. Қазір өз жұмысын орындап қана қоймай, туған еліне адал қызмет етудің үздік үлгісін көрсетіп келеді. Өз қаржысына ауылда көпсалалы спорт кешенін, балабақша, жас отбасыларға үй салғызды. Мұнан өзге де үлкен нысандар салып, ауылдағы елдің алғысына ие болды», - деді Нұрсұлтан Назарбаев.

Өз кезегінде Жақсылық Үшкемпіров: «Қазiр мен Жамбыл ауданына қарасты ауылға газ тартқызып, спорт кешенiн, балабақша мен қолжетiмдi пәтер салып жатырмын. Жетiм-жесiрлерге көмектесiп келемiн. Бұның барлығымен келешек ұрпаққа өнеге болсам деймiн. Солар мен сияқты артымнан ерсе деймiн. Менiң арманым бар. Бiзде көп болса 5 мыңнан аса ауыл бар шығар. Сондағы 5 мың қазақтың жiгiтi ауылдарын көтерiп жiберсе, одан басқа қандай бақыт керек? Бiз бiрiгiп, әлi талай шыңға жетемiз», - дедi.

Сондай-ақ мемелекет басшысы тарапынан кәсіпқой боксшы Қанат Ислам да марапатталды. Елбасы Қанатқа «Құрмет» орденін тапсырды.