Қазақстаннан шығатын келесі әлем чемпионы айтылды
Геннадий Головкинмен жұмыс істеген промоутер Том Леффлер (360 Promotions) бірінші орта салмақтағы қазақстандық боксшы Садриддин Ахмедовтің (14-0, 12 KO) алдағы жекпе-жегін талқылады, деп хабарлайды Prosports.kz.
13 желтоқсанда АҚШ-тың Калифорния штаты, Санта-Инес қаласында Садриддин америкалық Рафаэль Игбоквеге (17-5, 7 KO) қарсы рингке шығады.
— Біз Садриддинді болашақ әлем чемпионы деп санаймыз. Бұл – біздің компаниямен өткізетін оның екінші жекпе-жегі. Дәл осындай кездесулерде ол орта салмақтағы деңгейін көрсете алады. Рафаэль Игбоквені Сергей Богачук тоқтатып, Исраил Мадримовпен толық қашықтықта жекпе-жек өткізген. Бұл Садриддин үшін жақсы сынақ болады, - деді Леффлер The Ring басылымына берген сұхбатында.
Айта кетейік, Ахмедов Игбоквеге қарсы жекпе-жекке Головкиннің бұрынғы жаттықтырушысы Абель Санчеспен бірге дайындалып жатыр.