Әйгерім Әлімқұлова: Ұлттық құрамаға шақырту алуға үміттенемін

«Астана-Арена» стадионында «Астана» футбол клубы мен шымкенттік «БИІК-Қазығұрт» командалары арасында өткен Қазақстан чемпионатының  алғашқы ойыны  1:1 есебімен аяқталды. Матчтан кейін 2016 жылғы Қазақстан Чемпионатының алғашқы голының авторы атанған Әйгерім Әлімқұлованы сөзге тарттық.

 

- Бүгінгі ойын өте тартысты болды. Қарсыласымыз өте мықты. Чемпионатта қауқарлы командалардың қатары арта түскені жақсы. Ол футболшылардың әрі қарай дамуына көмектеседі. Әйелдер футболының әдемі футбол болғанын қалаймын. Өткен маусымда Көкшетауда ойнадым. Биыл жаңадан жасақталған елордалық ұжымның қатарына қосылдым. Ел чемпионатына дайындық өте жақсы өтті. Сол себепті маусымды жақсы бастадық. Бүгінгі ойында гол соққаныма өте қуаныштымын. Өйткені, ел чемпионатының алғашқы голы. Ең бастысы - ең мықты команданың қорғанысы мен қақпасын бұза алдық. Нәтижеге көңілім толады. Алайда, жеңіске жетуге мүмкіндік те болды. Енді екінші ойынға дайындаламыз. Бас бапкер алғашқы ойынның қорытындысын шығарып, кемші тұстарды түсіндіреді деп ойлаймын. Команданың көңіл-күйі керемет. Қарсыластар үшін жұмбақ команда саналамыз. Футболшылар да, жаттықтырушылар да жақсы.

 

- Команданың алға қойған мақсаты қандай?

 

- Мақсат - Қазақстан Чемпионатында жақсы нәтиже көрсетіп, Чемпиондар Лигасына жолдама алу. Кубок ойындарында сәл ғана жолымыз болмады. Жаңа ұжымға өзара түсіністік жетіспей қалған сияқты. Ел чемпионатында жақсы ойын көрсетеміз деп сенемін. Өз басым ұлттық құраманың қатарына шақырту алуға үміттімін. 

kff.kz сайтынан