«Әлемдік деңгейде». Танымал инсайдер Жәнібек Әлімханұлының жекпе-жегін бағалады
Knuckles and Gloves Boxing Radio подкасының жүргізушісі, кәсіби бокста танымал инсайдер, The Fight City және bkfc.com сайттарына мақала жазатын Патрик Коннор Legalbet.kz сайтына қазақстандық әлем чемпионы Жәнібек Әлімханұлының болашағына қатысты пікір білдірді, деп хабарлайды Prosports.kz.
4 қазан күні Австралияның Сидней қаласында кәсіпқой бокстан орта салмақтағы WBO және IBF нұсқалары бойынша әлем чемпионы қазақстандық Жәнібек Әлімханұлы (16-0, 11 KO) IBF желісі бойынша міндетті қарсылас жаңазеландиялық Андрей Михайловичті (21-1, 13 KO) тоғызыншы раундта нокаутқа түсірген еді. Алғашында бұл қарсыластар шілдеде кездесуі керек болған, бірақ қазақстандық боксшы салмақ қуу кезінде әлсіреп, ауруханаға түскен еді.
«Жәнібек бұл жекпе-жекпен өзіне біраз көбірек назар аудартқан сияқты – және бұл оған қажет нәтиже болды. Енді ол үлкен жекпе-жекке мүмкіндігінше тезірек қол жеткізе алады деп үміттенемін!
Михайлович әлсіз болды ма? Жәнібектің деңгейінде емес деп ойлаймын, өйткені ол бұған дейін өте жақсы қарсыластармен кездеспеген. Бірақ бұл жекпе-жек Жәнібектің, меніңше, әлемдік деңгейдегі мықты боксшылармен сайысуға лайық екенін көрсетті», – деді сарапшы.