Данияр Елеусіновтің қарсыласы жекпе-жекті аяқтай алмады
Қазақстандық боксшы Данияр Елеусінов (11-0, 6 КО) ұзақ уақыт үзілістен кейін рингке оралды.
Ол Алматыда өткен бокс кешінде филиппиндік Джо Нойнаймен (23-4-2, 11 КО) жұдырықтасты.
Кездесу жартылай орта салмақта өтіп, 9 раундқа есептелген еді. Бесінші раундтан соң Нойнай Даниярдың соққыларына шыдай алмай жұдырықтасудан бас тартты. Сондай-ақ филиппиндік бірінші және төртінші раундттарда нокдаун алды.
Осылайша, Данияр Елеусінов өзінің кәсіби мансабындағы он екінші жеңісіне қол жеткізіп, WBC Peace белдігін жеңіп алды. Ал Джо Нойнай бесінші рет жеңіліске ұшырады.
Айта кетейік, бұл Даниярдың 2021 жылдың желтоқсанынан кейінгі бірінші кездесуі болатын. Ол кезде қазақстандық спортшы төрешілердің бірауыздан шешімімен аргентиналық боксшы Хуан Эрнан Леальды (15-4-1, 4 КО) жеңіп, IBO нұсқасы бойынша жартылай орта салмақта әлем чемпионы атағын жеңіп алған еді.