Париждегі Олимпиаданың жабылу салтанаты: басталу уақыты мен тікелей көрсетілім

Бүгін қорытынды жарыстардан кейін Париждегі жазғы Олимпиада ойындарының жабылу салтанаты өтеді.

Соңғы спорттық жарыс Франция мен АҚШ құрамалары арасындағы әйелдер баскетбол турнирінің финалы болмақ. Ол қазақстандық уақыт бойынша сағат 18:30-да басталады. Records ("Рекордтар") деп аталатын жабылу салтанаты 80 мың көрерменге арналған және жеңіл атлетикадан олимпиадалық жарыстарды өткізетін "Стад де Франс" стадионында өтеді.

Іс-шара қазақстандық уақыт бойынша 11-нен 12 тамызға қараған түні басталады және шамамен екі сағатқа созылады. Жабылу аясында марафондағы медаль иегерлерін марапаттау, спортшылардың шеруі, олимпиада туын түсіру және оны келесі жазғы ойындардың иесіне тапсыру (Лос-Анджелес-2028) рәсімі өтеді.

Қазақстанда тікелей эфирді Qazaqstan, Qazsport, Jibek Joly, "Хабар" және "Ел арна" телеарналарынан көруге болады. Эфирлер Астана уақыты бойынша сағат 23:15-те басталады.