Асланбек Шымбергенов 2028 жылғы Олимпиада ойындарына қатыспақ

Бокстан әлем және Азия чемпионы Асланбек Шымбергенов Париж Олимпиадасынан кейінгі жоспарымен бөлісті, деп хабарлайды Prosports.kz тілшісі Sport Plus Qazaqstan сайтына сілтеме жасап.

Даңқты спортшы Лос-Анджелесте өтетін (2028 жылы) келесі Олимпиада ойындарына дайындалатынын ресми мәлімдеді.

Парижде 71 келіде өнер көрсеткен жерлесіміз алғашқы айналымда иорданиялық боксшыдан жеңіліп қалған болатын.

«Дайындығымыз жақсы болды. Жеңілгенім үшін ешкімге кінә артпайм, өзім кінәлімін. Тағдырыма Олимпиаданың медалі жазылмай тұрған шығар… Бірақ, әлі дайындаламын, еңбек етемін. Қате-кемшілікпен жұмыс істеймін. Төрт жылдан кейінгі Олимпиадаға Алла қаласа қатысамыз», - деді ол жерлестерімен кездесуі барысында.

Шымбергенов Парижден Қазақстанға оралып, туған жері – Жамбыл облысына келді. Жерлестері оны салтанатты түрде күтіп алып, сый-құрмет көрсетті.

Айта кетейік, Асланбек Шымбергенов Париж Олимпиадасының ашылу салтанатында Қазақстанның туын алып шықты. Ол – бокстан Қазақстан құрамасының капитаны, 2023 жылғы әлем чемпионы.