Өзбекстан Олимпиадада Испанияға қарсы матчты абыройлы аяқтады

Өзбекстан құрамасы Париждегі (Франция) Олимпиада ойындары футбол турнирінің топтық кезеңінің бірінші турында Испания құрамасымен матч өткізді, деп хабарлайды Prosports.kz.

«Парк де Прeнс» стадионында өткен кездесу 2:1 есебімен Испанияның пайдасына аяқталды. 29-минутта испандық қорғаушы Марк Пубил есеп ашты. Бірінші тайм аяқталар тұста Өзбекстан Олимпиада құрамасының капитаны Эльдор Шомуродов пенальтиден дәл соққымен таразы басын теңестірді.

59-минутта Серхио Гомес пенальтиден өзбек қақпашысы Абдувахид Нематовтан айла асыра алмағанымен, үш минуттан кейін ол өз командасының екінші голын соқты.

Айта кетейік, бұл матч Өзбекстан үшін тарихи болды – бұл елдің футбол командасы Олимпиада ойындарына алғаш рет қатысып отыр. Испания құрамасы соңғы ойындарда финалда Бразилиядан ұтылып, күміс жүлдегер атанды.