Қазақстандық теннисшілер Тунис пен Португалиядағы жарысты сәтті бастады

Т.Скатов іріктеу сайыстарының жартылай финалында дүниежүзілік рейтингіде 487-орында тұрған оңтүстіккореялық Квон Сун Вуды 6:4, 6:3 есебімен тізе бүктірді.

Тимофей Скатов іріктеу сайыстарының финалында рейтингіде 405-сатыдағы нидерландылық Макс Хаукесті ұтса, негізгі турнирге жолдама алады.

Аталмыш доданың жүлде қоры 82 мың АҚШ долларына бағаланған. Оның жеңімпазы 11 200 долларға қоса 75 рейтингілік ұпайға ие болады.

Тағы бір қазақстандық, әлемнің 223-ракеткасы Дмитрий Попко Оэйраш (Португалия) челленджер турнирінің іріктеу сайысында рейтингіде 641-сатыдағы корт иесі Педро Араухоны 7:5, 3:6, 6:4 есебімен ұтты. Үш сағатқа жуық уақытқа созылған тартысты бәсеке барысында Попко 16 брейк-пойнттың алтауын пайдаланды.

Дмитрий Попко іріктеу сайыстарының финалында әлемнің 285-ракеткасы, литвалық Вилиус Гаубастан өтсе, ол да негізгі жарысқа қосылады.